ఏపీ ముఖ్యమంత్రి నారా చంద్రబాబు నాయుడు శుక్రవారం తిరుమలలో పర్యటించారు. అనంతరం టీటీడీ అధికారులతో సీఎం చంద్రబాబు సమీక్షా సమావేశం నిర్వహించారు. ఈ సందర్భంగా తిరుమల కొండలకు సమీపంలో చేపడుతున్న ముంతాజ్ హోటల్ అనుమతులు రద్దు చేస్తున్నట్లు చంద్రబాబు ప్రకటించారు, ముంతాజ్ హోటల్‌కు గతంలో ఇచ్చిన అనుమతులు రద్దు చేస్తున్నట్లు చంద్రబాబు తెలిపారు. అలాగే టీటీడీలో అందరూ హిందూ ఉద్యోగులు ఉండేలా చర్యలు తీసుకుంటున్నామన్నారు.
తిరుమల తిరుపతి దేవస్థానం అధికారులతో సమీక్ష జరిపారు చంద్రబాబు. ఈ సందర్బంగా పలు కీలక వివరాలు వెల్లడించారు. కలియుగ ప్రత్యక్ష దైవం శ్రీనివాసుడు నెలవైన ఏడు కొండల్లో ఎలాంటి అపవిత్ర కార్యక్రమాలు జరగకూడదని చంద్రబాబు అభిప్రాయపడ్డారు. తిరుమలలో పరిశుభ్రతకు అధిక ప్రాధాన్యం ఇస్తున్నామన్నారు. ఈ క్రమంలోనే ఏడుకొండలకు సమీపంలో వాణిజ్య కార్యకలాపాల అంశం గురించి మాట్లాడిన చంద్రబాబు.. ఏడుకొండలకు ఆనుకుని ముంతాజ్ హోటల్ నిర్మాణానికి ప్రభుత్వం ఇచ్చిన అనుమతులు రద్దు చేస్తున్నట్లు ప్రకటించారు. 35.32 ఎకరాల విస్తీర్ణంలో ముంతాజ్ హోటల్ నిర్మించాలని తొలుత ప్రణాళికలు రచించారు. హోటల్ యాజమాన్యం కేవలం శాఖాహారం మాత్రమే అందించాలని నిర్ణయించింది.
అయితే ఏడుకొండలకు సమీపంలో ఎలాంటి ప్రైవేట్ కమర్షియల్ నిర్మాణాలకు అనుమతులు ఇవ్వకూడదని ఏపీ ప్రభుత్వం నిర్ణయించింది. ఈ విషయాన్ని ముఖ్యమంత్రి చంద్రబాబు నాయుడు తెలిపారు. ఏడుకొండల సమీపంలో ఎలాంటి కమర్షియలైజేషన్‌కు అనుమతులు ఇవ్వమని తెలిపారు. మరోవైపు పవిత్రమైన ఏడుకొండలకు సమీపంలో ఇలాంటి రిసార్ట్ నిర్మాణం ఏమిటంటూ ఇటీవల వ్యతిరేకత పెరుగుతోంది. తిరుపతిలో స్వామీజీలు కూడా ఆందోళన చేపట్టిన సంగతి తెలిసిందే. ఈ క్రమంలోనే ముంతాజ్ హోటల్ అనుమతులు రద్దు చేస్తున్నట్లు చంద్రబాబు నాయుడు ప్రకటించడం ప్రాధాన్యం సంతరించుకుంది.
