మహాశివరాత్రి వేడుకల నిర్వహణపై సంబంధిత అధికారులతో సమీక్ష నిర్వహించిన తూర్పు గోదావరి జిల్లా కలెక్టర్ శ్రీమతి పి. ప్రశాంతి గారు మరియు ఎస్పీ శ్రీ డి. నరసింహ కిషోర్ గారు.
- అధికారులు సమన్వయంతో పనిచేసి భక్తులకు ఇబ్బందులు లేకుండా పటిష్టమైన ఏర్పాట్లు చేయాలి.
- ప్రతి ఘాట్లో అవసరమైన బోట్లతో పాటు గజఈతగాళ్ళను, పోలీసు భద్రతను ఏర్పాటు చెయ్యాలి.
భక్తులకు అత్యంత భక్తి ప్రాధాన్యమైన మహాశివరాత్రి పర్వదిన మహోత్సవాల ఏర్పాట్లను పటిష్టవంతంగా నిర్వహించి , సమన్వయం చేసుకుని ఎటువంటి ఇబ్బందులు లేకుండా విజయవంతం చేయాలని జిల్లా కలెక్టర్ పి. ప్రశాంతి అధికారులను ఆదేశించారు.
శుక్రవారం స్థానిక జిల్లా కలెక్టరేట్ క్యాంపు కార్యాలయ సమావేశ మందిరంలో మహాశివరాత్రి సందర్భంగా ఫిబ్రవరి 26వ తేదీ జిల్లాలోని అన్ని ప్రముఖ శైవక్షేత్రాల్లో మహాశివరాత్రి ఉత్సవ నిర్వహణ ఏర్పాట్లపై… జిల్లా ఎస్పీ డి. నరసింహ కిషోర్, డిఆర్ఓ టి. సీతారామమూర్తి, దేవాదాయ శాఖ, రెవెన్యూ, పోలీసు, మున్సిపల్ , మత్స్య అధికారులతో కలసి జిల్లా కలెక్టర్ పి. ప్రశాంతి ముందస్తు ఏర్పాట్లపై సమీక్ష సమావేశం నిర్వహించారు.
ఈ సందర్బంగా కలెక్టర్ పి. ప్రశాంతి మాట్లాడుతూ… ప్రధానంగా నగరంలో, జిల్లాలో వివిధ ప్రాంతాలలో వున్న శైవక్షేత్రాల్లో వేలాది మంది భక్తులు పుణ్య స్నానాలు ఆచరించేందుకు హజరవుతారన్నారు. వారందరికీ ఎలాంటి లోటుపాట్లు, ఇబ్బందులు లేకుండా పటిష్ట ఏర్పాట్లు చేయాలన్నారు.
జిల్లాలో ముఖ్యంగా సీతానగరం మండలం వంగళపూడి నుంచి పట్టిసీమ వీరభద్ర స్వామి దేవస్థానం, కొవ్వూరు గోష్పాద ఘాట్, రాజమహేంద్రవరం నగరంలో పుష్కర ఘాట్, మార్కండేయ స్వామి దేవస్థానం ఘాట్, కోటిలింగాల ఘాట్స్కు వచ్చే భక్తులకు ఎటువంటి ఇబ్బందులు లేకుండా పటిష్టమైన ఏర్పాట్లు చెయ్యాలన్నారు. పట్టిసీమలో తూర్పు గోదావరి జిల్లాకు సంబంధించి వచ్చే భక్తులకు పుణ్య స్నానాలు, దర్శన సమాచారాన్ని అందించే విధంగా కంట్రోల్ రూమ్స్ ఏర్పాటు చెయ్యాలన్నారు. అదే విధంగా జిల్లాలోని అన్ని శైవక్షేత్రాల్లో కంట్రోల్ రూములను ఏర్పాటు చేయాలని కలెక్టర్ అన్నారు. ప్రతి ఘాట్ లో అవసరమైన బొట్స్ తో పాటు గజతగాళ్ళను , పోలీసు సిబ్బందిని ఏర్పాటు చెయ్యాలన్నారు.
అలాగే అన్ని ప్రాంతాల్లో వైద్య శిబిరాలు, 108 అంబులెన్స్ కు, అందుబాటులో వైద్యాధికారులు, వైద్య సిబ్బంది ఉండే విధంగా చర్యలు తీసుకోవాలని అన్నారు. భక్తులు రద్దిగా వున్న ప్రతి ప్రదేశంలో మైక్ సిస్టమ్, బారికేడ్స్, సిసి కెమెరాలు, స్నానాలు తరువాత డ్రెస్ చేంజింగ్ గదులను ఏర్పాటు చెయ్యాలన్నారు. కొవ్వూరు, రాజమహేంద్రవరం డివిజన్ లో మున్సిపల్ కార్యాలయంలో పట్టిసీమలో భక్తులకు సమాచారం అందించే విధంగా కంట్రోల్ రూమ్స్ ఏర్పాటు చెయ్యాలాన్నారు.
అనంతర జిల్లా ఎస్పీ శ్రీ డి. నరసింహ కిషోర్ గారు మాట్లాడుతూ, మహా శివరాత్రి పండుగ సందర్భంగా అన్ని శైవక్షేత్రాలలో పటిష్ట పోలీసు బందోబస్తు ఉండేవిధంగా చర్యలు తీసుకుంటున్నామని, అవసరమైన చోట అధిక పోలీసు బందోబస్తు కూడా ఏర్పాటు చేస్తామన్నారు. అన్ని ప్రముఖ శైవక్షేత్రాల వద్ద ఎస్.డి.ఆర్.ఎఫ్. సిబ్బంది, రెస్క్యూ టీమ్, ఫైర్ ఇంజన్ వాహనాలను అందుబాటులో ఉంచాలని సంబందిత అధికారులను ఆదేశించారు.
